سلالات دواجن التسمين

سلالات دواجن التسمين




على الرغم من ان الموضوع سهل ويبدو بسيط يعنى اى احد ممكن يسال نفسه ايه الى هايستفاده انه يعرف انواع وسلالات دجاج التسمين ؟

والاجابه ببساطه ان فى اختلاف بين السلالات وكل سلاله لها نظامها فى وقت التربيه وبرامج الاضاءه ومعاملات التحويل الغذائى ومتوسطات الاوزان فى نهايه الدوره ومعدل النمو وانا لو عرفت السلاله الى باشتغل عليها هاعرف ببساطه ازاى اتعامل مع القطيع وده مش صعب لانى ممكن احصل عن معلومات عن السلاله من خلال كتالوج شركه الامهات او الى باجيب منه الكتاكيت احصل عليه وبالتالى من بدايه الدوره اقدر اعرف ايه هى انسب درجات الحراره للسلاله دى ايه هو انسب برنامج للاضاءه معاملات التحويل وهكذا وان شاء الله هاضرب امثله بسيطه بالنسبه للموضوع ده بس الاول نكمل كلامنا عن انواع دجاج التسمين :


دجاج التسمين فى منه نوعين منه ابيض الريش الى بنسميه الفراخ البيضه ودى من مميزاتها انها سريعه النمو والى ممكن تصل طول الدوره من 35 الى 37 يوم حسب حاله القطيع ومعدلات النمو ولكن النوع ده بيكون حساس جدا للبرد وخصوصا الاصابه بالمايكوبلازما وان كل ما الفراخ البيضه دى بتكبر بيكون فرصه اصابه بالبرد عاليه علشان كده لازم يكون فى اهتمام بالتهويه طوال الدوره وخصوصا كل ما الفراخ كبرت .

برده الفراخ البيضه مش ممكن تستحمل درجات الحراره العاليه علشان كده فرصه اصابتها بالاحتباس الحرارى بتكون عاليه

انواعها :


1- اربر ايكرز .وهو من افضل واقدم الانواع المعروفة


2- الافيان والمشهور هنا فى مصر افيان 48 والسلاله دى الىبيميزها انها مش بتحتاج درجات حراره عاليه خلال التحضين يعنى المعروف لدى المربيين ان درجه حراره التحضين فى الفتره الاولى يعنى اول يوم هى 34 الى 35 درجه وده ممكن يكون مناسب لسلالات كتير بس الافيان بيحب درجات حراره معتدله يعنى ممكن ابدا له ب 33 وفى بعض الاحيان 32 بس الانسب 33 بالاقى الكتاكيت مفرفشه ومبسوطه ومنتشره وزى الفل وفى الاول والاخر سلوك الكتاكيت هو الى بيحدد ان الحراره مناسبه او لا .


3- سلاله الهبرد والمعروف عن السلاله دى ان الكتكوت نفسه بيكون حجمه كبير من اول يوم وبيبدا يكبر كهيكل ولحم وترييش من اليوم الاول بيكون فى تغير ملحوظ فى شكل الكتكوت وترييشه وده ممكن ما القيهوش فى سلالت تانيه زى الافيان والكاب والروس الى الكتكوت بيكون فيه ضعيف ومش باين عليه اى تغير ملحوظ فى النمو لكن بعد 15 الى 20 يوم بالاقى تغيير كبير فى النمو ملحوظ لدرجه ان بعض المربيين بيشك ان الفراخ دى سرده ومقلب من الشركه لكنه بمجرد ما بيتصل بالجهه المسئوله عن الكتاكيت بيفهموه المضووع ده .

4- الروس واعتقد ان السلاله دى انها بتتحمل الحر بشكل كبير وبالتلى بتكون مناسبه للتربيه فى العنابر المفتوحه فى فتره الصيف وموجات الحر .

5- الكب دى سلاله بتمتاز بانها بترمى متوسطات اوزان غير طبيعيه خصوصا لو طبقت برنامج الاضاءه الخاص بيها والموجود فى الكتالوج والى ممكن يصل الى 6 ساعات اضلام فى نهايه الدوره و الاسبوع الاخير منها .

6- اللوهمان

7- اناك .
سلالات ملونه الريش :

اصابتها بالبرد بتكون اقل وبتقاوم درجات الحراره العاليه وظروف الطقس المختلفه وبتكون اغلى فى سعر الكيلو عن الفراخ البيضاء لانها بتجمع بين طعم الفراخ البلدى وبتوصل لاوزان الفراخ البيضه ولكن المشكله ان النوع ده بيحتاج فتره تسمين اكبر ممكن تصل الى 60 يوم او اكتر مثل :

1- الشيفر الاحمر .

2- ايزابراون.

3- الفراخ الساسو ودى اشهرها فى مصر وبيكون ليها الوان كتيره وفى هناك نوعين من المربيين الى بيربى الفراخ الساسو تحضين وتربيه من عمر يوم لحد 15 الى 20 يوم ويسوق على العمر ده للعيادات والاهالى وده ممكن يكون مشروع كويس جدا لكن مشكلته فى تسويقه خصوصا لو انا ربيت اعداد كبيره وعلى فكره الفراخ دى فرصه اصابتها بالكوكسيديا والكلوسترديا بتكون كبيره وغالبا بتتكرر الاصابه فى الدوره فيفضل عمل برنامج كل اسبوع او 10 ايام للوقايه منهم مع طول الدوره .

4- شكرا ليكم واتمنى الموضوع يعجبكم وفى انتظار تعليقاتكم والموضوع الى جى هانتكلم عن ازاى اطهر المزرعه واعدها لاستقبال قطيع جديد

منقول للافادة ..